Hunyo 14, 2022
Martes sa Ika-onse nga Semana sa Panahon sa Tuig
Mga Pagbasa Karong Adlawa
Paminaw sa Iningles
“Apan sultihan Ko kamo, higugmaa ang inyong mga kaaway ug pag-ampo alang sa mga naglutos kaninyo, aron mahimo kamong mga anak sa inyong langitnong Amahan.” Matthew 5:44-45a
Dili sayon kining sugo sa atong Ginoo. Apan kini usa ka sugo sa paghigugma.
Una, gitawag kita Niya sa paghigugma sa atong mga kaaway. Kinsa man ang atong mga kaaway? Hinaot nga wala kitay “mga kaaway” nga tinuyo natong gipiling dumtan. Apan tingali adunay mga tawo sa atong kinabuhi nga matintal kitang masuko kanila ug lisod alang kanato nga higugmaon. Tingali maisip natong mga kaaway ang bisan kinsa nga kalisdan nato sa atong pakiglabot.
Ang paghigugma kanila wala magpasabot nga kinahanglan mahimo nato silang suod kaayong mga higala, apan nagpasabot kini nga kinahanglan maningkamot kita nga makabaton og tinuod nga pagmahal nga makita sa pag-atiman, pagpakabana, pagsabot ug pagpasaylo kanila. Mahimong lisod kining ipakita ngadto sa tanan, apan kinahanglan kini ang atong tumong.
Makatabang ang ikaduhang bahin niini nga sugo. Ang pag-ampo alang sa mga naglutos kanato makatabang nga motubo kita sa hustong gugma ug pagmahal nga kinahanglan natong ugmaron. Tin-aw ra kaayo kining bahina sa gugma, bisan tuod lisod usab kaayo kini.
Hunahunaa ang mga tawo nga lisod kaayo nimong higugmaon. Kadtong imong gikasuk-an. Mahimong usa kini ka sakop sa pamilya, kauban sa trabaho, silingan o usa ka tawo kaniadto nga wala pa gayod nimo makapasig-uli. Nahiuyon niining tudling sa Ebanghelyo ang matinud-anong pag-angkon nga adunay bisan usa lang ka tawo, o tingali labaw pa sa usa, nga kalisdan nimo sa imong pakiglabot, sa dayag man o sa imong sulod. Ang pag-angkon niini usa lamang ka buhat sa pagkamatinud-anon.
Sa mailhan na nimo kining tawhana o kining mga tawhana, hunahunaa kon nag-ampo ba ka alang kanila. Kanunay ka bang mogahin og panahon sa pagtugyan kanila ngadto sa Dios pinaagi sa pag-ampo? Nag-ampo ka ba nga ibubo sa Dios ang Iyang grasya ug kalooy ngadto kanila? Mahimong lisod kining buhaton, apan usa kini sa labing makaayo nga mga buhat nga imong mahimo. Mahimong lisod ang pagpakita og gugma ug pagmahal kanila, apan dili lisod ang tinuyong pagpili sa pag-ampo alang kanila.
Ang pag-ampo alang sa mga tawo nga kalisdan nato sa atong pakiglabot mao ang yawe sa pagtugot sa Dios nga maugmad sa atong mga kasingkasing ang tinuod nga gugma ug pagpakabana alang kanila. Usa kini ka paagi sa pagtugot sa Dios nga usbon ang atong mga emosyon ug pagbati aron dili na kita magpabiling nagkupot sa kasuko o bisan sa pagdumot.
Ipanaad karong adlawa ang imong kaugalingon sa pag-ampo alang sa tawo nga labing lisod nimong pakiglabotan. Lagmit dili dayon mausab niini nga pag-ampo ang imong gugma alang kaniya sa usa lang ka gabii, apan kon magmapasaligon ka niining paagiha sa pag-ampo matag adlaw, sa paglabay sa panahon hinayhinayng usbon sa Dios ang imong kasingkasing ug gawason ka gikan sa kabug-at sa kasuko ug kasakit nga mahimong makapugong kanimo sa pagbaton sa gugma nga gusto Niyang ipakita nimo ngadto sa tanang tawo.
Ginoo sa hingpit nga gugma, nag-ampo ako alang sa tawo nga gusto Nimong iampo nako. Tabangi ako sa paghigugma sa tanang tawo ug tabangi ako ilabina sa paghigugma niadtong lisod higugmaon. Han-aya pag-usab ang akong mga pagbati ngadto kanila ug tabangi ako nga mahigawas sa bisan unsang kasuko. Jesus, nagsalig ako Kanimo.
Nobena sa Sagradong Kasingkasing
Mga petsa sa nobena: Hunyo 15-23, 2022
Hunyo 24, 2022: Solemnidad sa Sagradong Kasingkasing
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Santos/Kasaulogan Karong Adlawa
Mga Kapilian sa mga Basahon sa Misa
