இரக்கத்தையே விரும்புகிறேன்

ஜூலை 15, 2022
பொதுக்காலம் பதினைந்தாம் வாரம் வெள்ளிக்கிழமை
இன்றைய வாசகங்கள்

புனித பொனவெந்தூர், ஆயரும் மறைவல்லுநரும்—நினைவு

காணொளி

“பலியை அல்ல, இரக்கத்தையே விரும்புகிறேன் என்பதன் பொருளை நீங்கள் அறிந்திருந்தால், குற்றமற்ற இவர்களைக் கண்டனம் செய்திருக்க மாட்டீர்கள்.”  மத்தேயு 12:7

இயேசுவின் திருத்தூதர்கள் பசியோடு இருந்ததால், வழியில் நடந்துசெல்லும்போது தங்கள் பசியைப் போக்கத் தானியக் கதிர்களைக் கொய்தார்கள்.  இதனால், ஓய்வுநாளில் “சட்டத்திற்கு மாறானது” என்று தாங்கள் கூறிய செயலைச் செய்ததற்காகப் பரிசேயர்கள் திருத்தூதர்களைக் கண்டனம் செய்தார்கள்.  நடந்துசெல்லும்போது கதிர்களைக் கொய்வது “வேலை” செய்வதாகக் கருதப்படுவதால், ஓய்வுநாளில் ஓய்ந்திருக்க வேண்டும் என்ற சட்டத்தை அவர்கள் மீறிவிட்டதாகப் பரிசேயர்கள் கூறினார்கள்.

உண்மையாகவா?  திருத்தூதர்கள் நடந்துசெல்லும்போது தங்கள் பசியைப் போக்கக் கதிர்களைக் கொய்தது பாவம் என்று பரிசேயர்கள் உண்மையிலேயே நினைத்தார்களா?  இந்தக் கண்டனம் எவ்வளவு அபத்தமானது, பகுத்தறிவுக்கு முரணானது என்பதைப் புரிந்துகொள்வது நமக்குக் கடினமாக இருக்காது என்று நம்பலாம். திருத்தூதர்கள் எந்தத் தவறும் செய்யவில்லை; இருப்பினும் அவர்கள் கண்டனத்திற்கு உள்ளானார்கள்.  இயேசு சுட்டிக்காட்டுவதுபோல், அவர்கள் “குற்றமற்றவர்கள்”.

“பலியை அல்ல, இரக்கத்தையே விரும்புகிறேன்” என்ற மறைநூல் வாக்கை நினைவூட்டி, பரிசேயர்களின் பகுத்தறிவுக்கு முரணான போக்கிற்கு இயேசு பதிலளிக்கிறார்.  இந்தப் பகுதியையும் இரக்கம் காட்டும்படி கடவுள் அளிக்கும் இந்தக் கட்டளையையும் பரிசேயர்கள் புரிந்துகொள்ளாததால்தான், திருத்தூதர்கள் தவறாகக் கண்டனம் செய்யப்பட்டார்கள் என்பதை அவர் சுட்டிக்காட்டுகிறார்.

ஓய்வுநாளில் ஓய்ந்திருக்க வேண்டும் என்ற கட்டளை கடவுளிடமிருந்து வந்தது.  ஆனால், ஓய்ந்திருக்க வேண்டும் என்ற கட்டளை, வெறுமனே அதைக் கடைப்பிடிப்பதற்காகவே கொடுக்கப்பட்டதல்ல.  கண்டிப்பாகக் கடைப்பிடிப்பதன் மூலமே எப்படியோ கடவுளுக்கு மதிப்பளிக்கும் ஒரு சட்ட விதி அல்ல இது.  நமக்கு ஓய்வும் புத்துணர்வும் தேவை என்பதை அறிந்த கடவுள், மனிதகுலத்திற்கு அளித்த கொடையே ஓய்வுநாள் ஓய்வு.  ஒவ்வொரு வாரமும் நம் பரபரப்பைக் குறைத்துக்கொள்ளவும், கடவுளுக்குச் சிறப்பான வழிபாடு செலுத்தவும், பிறருடன் மகிழ்ந்து உறவாடவும் நமக்கு நேரம் தேவை என்பதை அவர் அறிந்திருந்தார்.  ஆனால் பரிசேயர்கள் ஓய்வுநாள் ஓய்வை ஒரு சுமையாக மாற்றிவிட்டார்கள்.  கடவுளை மகிமைப்படுத்தவோ மனித உள்ளத்திற்குப் புத்துணர்வு அளிக்கவோ உதவாத, சட்டத்தை மட்டுமே வலியுறுத்தும் கடுமையான ஓர் அனுசரிப்பாக அதை ஆக்கிவிட்டார்கள்.

கடவுளுடைய சட்டத்தை இரக்கத்தின் கண்ணோட்டத்தில் புரிந்துகொள்ள அவர் நம்மை அழைக்கிறார் என்பது இந்தப் பகுதியிலிருந்து நாம் கற்றுக்கொள்ளக்கூடிய ஒரு முக்கியமான உண்மை.  இரக்கம் எப்போதும் நமக்குப் புத்துணர்வு அளிக்கிறது, நம்மை உயர்த்துகிறது, புதிய ஆற்றலால் நம்மை நிரப்புகிறது.  அது நம்மை வழிபடத் தூண்டுகிறது; நம்பிக்கையால் நம்மை நிரப்புகிறது.  சட்டத்தை மட்டுமே வலியுறுத்தும் ஒரு பெரும் சுமையை இரக்கம் நம்மீது சுமத்துவதில்லை; மாறாக, கடவுளின் இரக்கமும் சட்டமும் இணைந்து நம்மைப் புதுப்பித்துப் புத்துணர்வு அளிக்கின்றன.

கடவுளின் கட்டளைகளையும் அவரது சட்டத்தையும் நீங்கள் எப்படிப் பார்க்கிறீர்கள் என்பதை இன்று சிந்தித்துப் பாருங்கள்.  சட்டத்தை மட்டுமே வலியுறுத்தும், சுமையான ஒரு கடமையாக அவற்றைப் பார்க்கிறீர்களா?  அல்லது உங்கள் சுமையைக் குறைப்பதற்காகக் கடவுளின் இரக்கம் அளிக்கும் ஓர் ஆசியாக அவற்றைப் பார்க்கிறீர்களா?

இரக்கமுள்ள என் ஆண்டவரே, உமது திருச்சட்டத்தை நேசிக்க எனக்கு உதவும்.  உமது இரக்கம் மற்றும் அருளின் ஒளியில் அதை உண்மையாகக் காண எனக்கு உதவும்.  நீர் கட்டளையிடும் அனைத்தாலும் நான் புத்துணர்வு பெற்று, உமது திருவுளத்தால் உயர்த்தப்படுவேனாக.  இயேசுவே, உம்மில் நம்பிக்கை வைக்கிறேன்.

மேலும் நற்செய்திச் சிந்தனைகள்

இறை இரக்கச் சிந்தனைகள்

அனைத்துப் புனிதர்கள்/திருவிழாக்கள்

இன்றைய புனிதர்: புனித பொனவெந்தூர்

திருப்பலி வாசிப்புகளுக்கான தெரிவுகள்

சிறப்புப் படம்: ஜேம்ஸ் திசோ, பொதுப் பயன்பாட்டில் உள்ளது, Wikimedia Commons வழியாக