15 Julai 2022
Ijumaa ya Juma la Kumi na Tano la Kipindi cha Mwaka
Masomo ya Leo
Mtakatifu Bonaventura, Askofu na Mwalimu wa Kanisa—Kumbukumbu
Sikiliza kwa Kiingereza
“Kama mngejua maana ya maneno haya, Nataka huruma, wala si sadaka, msingewahukumu hatia watu hawa wasio na hatia.” Mathayo 12:7
Mitume wa Yesu walikuwa na njaa, nao walichuma masuke ya nafaka walipokuwa wakitembea ili kutuliza njaa yao. Kwa sababu hiyo, Mafarisayo waliwahukumu Mitume kwa kufanya kile walichodai kuwa “hakiruhusiwi kisheria” siku ya Sabato. Walidai kwamba kuchuma masuke ya nafaka walipokuwa wakitembea kulihesabiwa kuwa “kazi” na, hivyo, walivunja sheria iliyotaka watu wapumzike siku ya Sabato.
Kweli? Je, Mafarisayo walifikiri kwa dhati kwamba Mitume walitenda dhambi kwa kuchuma nafaka walipokuwa wakitembea ili kutuliza njaa yao? Tunatumaini si vigumu kwetu kuona jinsi hukumu hii ilivyokuwa ya kipuuzi na isiyo na mantiki. Mitume hawakufanya kosa lolote, lakini hata hivyo walihukumiwa hatia. Walikuwa “watu wasio na hatia” kama Yesu anavyoeleza.
Yesu anajibu hoja zisizo na mantiki za Mafarisayo kwa kuwakumbusha maneno ya Maandiko: “Nataka huruma, wala si sadaka.” Naye anaeleza kwamba Mitume walihukumiwa hatia kimakosa kwa sababu Mafarisayo hawaelewi kifungu hiki wala amri hii ya Mungu ya kuwa na huruma.
Amri ya kupumzika siku ya Sabato ilitoka kwa Mungu. Lakini amri hiyo ya kupumzika haikuwekwa kwa ajili tu ya kutimizwa. Haikuwa takwa fulani la kisheria ambalo lingemheshimu Mungu kwa namna fulani kwa kulizingatia tu kwa ukali. Pumziko la Sabato lilikuwa hasa zawadi ya Mungu kwa wanadamu, kwa kuwa Mungu alijua kwamba tulihitaji kupumzika na kupata nguvu mpya. Alijua kwamba tulihitaji muda kila wiki wa kupunguza shughuli zetu, kumwabudu Mungu kwa namna ya pekee na kufurahia kuwa pamoja na wengine. Lakini Mafarisayo waliligeuza pumziko la Sabato kuwa mzigo. Walilifanya kuwa uzingatiaji mkali wa sheria ambao haukumtukuza Mungu wala kuiburudisha roho ya mwanadamu.
Ukweli mmoja muhimu tunaoweza kujifunza kutokana na kifungu hiki ni kwamba Mungu anatuita tuitafsiri sheria Yake kwa mtazamo wa huruma. Huruma hutuburudisha daima, hutuinua na kutujaza nguvu mpya. Inatuhamasisha kumwabudu Mungu na kutujaza matumaini. Huruma haitutwiki mzigo mzito wa kushikilia sheria kwa ukali; badala yake, huruma ya Mungu pamoja na sheria Yake hutupatia nguvu mpya na kutuburudisha.
Tafakari leo jinsi unavyoziona amri za Mungu na sheria Yake. Je, unaiona sheria hiyo kuwa takwa lenye kulemea la kushikilia sheria kwa ukali? Au unaiona kuwa baraka ya huruma ya Mungu inayokusudiwa kuupunguza mzigo wako?
Bwana wangu mwenye huruma, nisaidie kuipenda sheria Yako. Nisaidie kuiona kwa kweli katika mwanga wa huruma na neema Yako. Niburudishwe kwa yote unayoamuru na niinuliwe kwa mapenzi Yako. Yesu, nakutumainia.
Tafakari juu ya Huruma ya Mungu
Mtakatifu wa Siku: Mtakatifu Bonaventura
Machaguo ya Masomo ya Misa Takatifu
Picha Iliyoangaziwa: James Tissot, Miliki ya umma, kupitia Wikimedia Commons
_-_James_Tissot_-_overall.jpg){kind=link}