తెలుగు

ప్రభువు కోసం సిద్ధంగా ఉండటం

నవంబర్ 8, 2020
సామాన్య కాలంలోని ముప్పై రెండవ ఆదివారం, సంవత్సరం A
నేటి పఠనాలు

ఆంగ్లంలో వినండి

“కాబట్టి, మెలకువగా ఉండండి; ఎందుకంటే మీకు ఆ రోజు గానీ ఆ గంట గానీ తెలియదు.”  మత్తయి 25:13

మీరు ఈ లోకజీవితాన్ని విడిచివెళ్లే రోజు, గంట మీకు తెలిస్తే ఎలా ఉంటుందో ఊహించండి.  అనారోగ్యం వల్లనో వయస్సు వల్లనో మరణం సమీపిస్తోందని కొందరికి తెలుసు.  అయితే మీ సొంత జీవితానికి సంబంధించి దీని గురించి ఆలోచించండి.  ఆ రోజు రేపేనని యేసు మీకు చెబితే ఎలా ఉంటుంది?  మీరు సిద్ధంగా ఉన్నారా?

మీరు పూర్తి చేయాలనుకునే అనేక ఆచరణాత్మక విషయాలు బహుశా మీకు గుర్తుకు వస్తాయి.  చాలామంది తమ ఆత్మీయులందరి గురించి, తమ మరణం వారిపై ఎలాంటి ప్రభావం చూపుతుందనే దాని గురించి ఆలోచిస్తారు.  ప్రస్తుతానికి అవన్నీ పక్కనపెట్టి, ఒక్క దృక్కోణం నుంచే ఈ ప్రశ్నను ధ్యానించండి.  యేసును కలుసుకోవడానికి మీరు సిద్ధంగా ఉన్నారా?

మీరు ఈ లోకజీవితాన్ని విడిచివెళ్లిన తరువాత ఒక్క విషయమే ముఖ్యమవుతుంది.  యేసు మీతో ఏమంటారు?  పైన ఉటంకించిన పవిత్ర గ్రంథ వాక్యానికి కొద్దిగా ముందు, యేసు పదిమంది కన్యల ఉపమానాన్ని చెబుతారు.  వారిలో కొందరు వివేకవతులు; వారి దీపాలకు నూనె ఉంది.  పెండ్లికుమారుడు రాత్రి ఆలస్యంగా వచ్చినప్పుడు, వారు వెలుగుతున్న దీపాలతో అతనిని కలుసుకోవడానికి సిద్ధంగా ఉన్నారు; అతడు వారిని స్వాగతించాడు.  అవివేకవతులు సిద్ధంగా లేరు; వారి దీపాలకు నూనె లేదు.  పెండ్లికుమారుడు వచ్చినప్పుడు, వారు అతనిని కలుసుకునే అవకాశం కోల్పోయారు; “నిజంగా మీతో చెబుతున్నాను, మీరెవరో నాకు తెలియదు” అనే మాటలు విన్నారు (మత్తయి 25:12).  

వారి దీపాలలో నూనె ఉండటం లేదా లేకపోవడం క్రైస్తవ ప్రేమకు ప్రతీక.  ఏ సమయంలోనైనా, ఏ రోజునైనా ప్రభువును కలుసుకోవడానికి మనం సిద్ధంగా ఉండాలంటే, మన జీవితాలలో క్రైస్తవ ప్రేమ ఉండాలి.  క్రైస్తవ ప్రేమ అనేది ప్రేమావేశం లేదా ప్రేమానుభూతి కంటే ఎంతో గొప్పది.  క్రీస్తు హృదయంతో ఇతరులను ప్రేమించడానికి చేసే సంపూర్ణ నిబద్ధతే క్రైస్తవ ప్రేమ.  ఇతరులకు ప్రథమ స్థానం ఇవ్వాలని ఎంచుకుంటూ, యేసు మనల్ని ఇవ్వమని కోరేదంతా వారికి అందిస్తూ, మనం రోజూ అలవరచుకునే సద్గుణం అది.  అది ఒక చిన్న త్యాగం కావచ్చు లేదా వీరోచితమైన క్షమాపణా కార్యం కావచ్చు.  ఏదేమైనా, మన ప్రభువును కలుసుకోవడానికి సిద్ధంగా ఉండాలంటే మనకు క్రైస్తవ ప్రేమ అవసరం.

మీ జీవితంలో మీరు ఎవరిని ప్రేమించాలని దేవుడు కోరుతున్నారో, వారి గురించి ఈ రోజు ధ్యానించండి.  మీరు వారిని ఎంత బాగా ప్రేమిస్తున్నారు?  మీ నిబద్ధత ఎంత సంపూర్ణంగా ఉంది?  మీరు ఎంతవరకు వెళ్లడానికి సిద్ధంగా ఉన్నారు?  ఈ వరం మీలో కొరవడటం గురించి మీకు ఏది గుర్తుకు వచ్చినా, దానిపై శ్రద్ధ పెట్టండి. మీరు కూడా వివేకంతో, ఏ సమయంలోనైనా ప్రభువును కలుసుకోవడానికి సిద్ధంగా ఉండేలా, ఆయన కృప కోసం ప్రభువును వేడుకోండి.

ప్రభువా, నా జీవితంలో క్రైస్తవ ప్రేమ అనే అతీంద్రియ వరం కోసం ప్రార్థిస్తున్నాను.  దయచేసి ఇతరుల పట్ల ప్రేమతో నన్ను నింపి, ఈ ప్రేమలో ఎంతో ఉదారంగా ఉండటానికి నాకు సహాయం చేయి.  నేను దేనినీ దాచుకోకుండా నన్ను నేను పూర్తిగా సమర్పించుకునేలా చేయి; తద్వారా, నీవు నన్ను నీ ఇంటికి ఎప్పుడు పిలిచినా, నిన్ను కలుసుకోవడానికి పూర్తిగా సిద్ధంగా ఉండేలా చేయి.  యేసూ, నేను నీపై నమ్మకం ఉంచుతున్నాను.

మరిన్ని సువార్త ధ్యానాలు

దైవకారుణ్య ధ్యానాలు

నేటి పునీతులు/పండుగలు

దివ్యబలిపూజ పఠనాల ఎంపికలు

పైన చూపిన ప్రత్యేక చిత్రం: ఫీబీ అన్నా ట్రక్వేర్ చిత్రించిన పదిమంది కన్యల ఉపమానం (ఒక భాగం)