July 23, 2020
Thursday of the Sixteenth Week of Ordinary Time
Readings for Today
Santa Brigida ng Sweden, Relihiyosa—Opsiyonal na Paggunita
Lumapit ang mga alagad kay Hesus at nagtanong, “Bakit po Kayo nagsasalita sa mga tao sa pamamagitan ng mga talinghaga?” Sumagot Siya sa kanila, “Sapagkat ipinagkaloob sa inyo ang pagkaunawa sa mga hiwaga ng Kaharian ng langit, ngunit hindi ito ipinagkaloob sa kanila. Ang sinumang mayroon ay bibigyan pa at sasagana; ngunit ang sinumang wala, maging ang anumang nasa kanya ay kukunin pa.” Mateo 13:10-12
Makatarungan ba iyon? Sa unang pagbasa, maaaring hindi gayon ang dating. Bakit ipangangako ni Hesus ang higit pa sa mga may higit na, at ang mas kaunti sa mga wala? Tinutumbok nito ang pinakadiwa ng hiwaga ng biyaya at ng hiwaga ng Kaharian ng Langit!
Una sa lahat, nakikita nating nagsalita si Hesus sa mga tao sa pamamagitan ng mga talinghaga, ngunit malinaw at tuwiran Siyang nagsalita sa Kanyang mga alagad. Ipinaliwanag ni Hesus na ito ay “Sapagkat ipinagkaloob sa inyo ang pagkaunawa sa mga hiwaga ng Kaharian ng Langit, ngunit hindi ito ipinagkaloob sa kanila.” Kaya naman gumagamit si Hesus ng pananalitang may nakakubling kahulugan kapag nangungusap sa napakaraming tao.
Sa madaling salita, ang sinasabi ni Hesus ay may mga taong mas bukas sa katotohanan kaysa sa iba. Kapag ang isang tao ay hindi bukas, nalilimitahan si Hesus kaya kailangan Niyang magsalita sa pamamagitan ng mga talinghaga. Isa sa mga layunin ng talinghaga ay ang pukawin ang pag-iisip ng isang tao. Isa itong paraan upang maakit sila at mapag-isipan nila ang Salitang ipinahayag.
Kapag ang isang tao ay bukas sa Katotohanan, tulad ng mga alagad, naaalis ni Hesus ang lambong at nakapagsasalita Siya nang malinaw, malalim, at maganda tungkol sa mga hiwaga ng Kaharian ng Langit. Ito ang dapat nating maging layunin. Dapat nating hangaring mapabilang sa mga “nakauunawa.” Dapat nating sikaping maunawaan ang lahat ng sinasabi ni Hesus at buong-pusong maniwala rito. Sa katunayan, kapag nagsimula tayong maniwala at pagkatapos ay isabuhay ang ating pinaniniwalaan, magsisimula tayo sa isang kahanga-hangang paglalakbay ng pananampalataya at pag-unawa na hindi natin dating akalaing posible.
Ito ang ibig sabihin ni Hesus nang sabihin Niya, “ang sinumang mayroon ay bibigyan pa.” Ganito ang buhay ng biyaya: sa sandaling simulan nating tanggapin ang lahat ng totoo at hayaan itong magpanibago sa ating buhay, tatanggap tayo ng higit na higit kaysa sa anumang naisip natin. Sa kabilang banda, kapag tumanggi tayong makinig at umunawa, maging ang kaunting pananampalataya at pag-unawang taglay natin ay unti-unting maglalaho at mapapalitan ng kalituhan.
Pagnilayan ngayon kung gaano ka kabukas sa Salita ng Diyos at sa lahat ng nais Niyang sabihin sa iyo. Sikapin mong makinig at umunawa. Kung gagawin mo ito, matutuklasan mong may isang maluwalhating buhay ng biyaya na naghihintay lamang na ipagkaloob sa iyo nang buong kasaganaan.
Lord, I do want to know You. I do want to seek You and to discover all that You have to say. Help me to turn to You in all things and to grow continually deeper in the life of faith. Jesus, I trust in You.
Higit pang mga Pagninilay sa Ebanghelyo
Mga Pagninilay sa Inaawit na Awa ng Diyos
Santo ng Araw – Santa Brigida ng Suwesya, Relihiyosa
Mga Pagpipilian sa mga Pagbasa sa Misa
Image: Jesus Discourses with His Disciples by James Tissot
