Hulyo 16, 2021
Biyernes sa Ikanapulog-limang Semana sa Ordinaryong Panahon
Mga Pagbasa Karong Adlawa
Mahal nga Birhen sa Bukid sa Carmelo—Dili Obligadong Handumanan
Paminaw sa Iningles
Si Jesus miagi sa usa ka kaumahan sa trigo sa Adlawng Igpapahulay. Gigutom ang Iyang mga tinun-an ug nagsugod sila pagpangutlo sa mga uhay ug pagkaon niini. Sa pagkakita niini sa mga Pariseo, miingon sila Kaniya, “Tan-awa, ang Imong mga tinun-an nagbuhat sa dili uyon sa balaod nga buhaton sa Adlawng Igpapahulay.” Matthew 12:1–2
Sa dihang gihatag ni Moises ang Napulo ka Sugo ngadto sa katawhan, adunay pagdili sa pagtrabaho sa Adlawng Igpapahulay. Ang usa ka bahin sa Ikatulong Sugo nag-ingon nga “dili ka magbuhat ug bisan unsang trabaho” sa Adlawng Igpapahulay (Exodus 20:10). Sa panahon ni Jesus, daghan nang mga pagpasabot ang gidugang sa mga Pariseo niining balaora ug gipalapdan kini aron maglakip sa mokabat ug 39 ka nagkalainlaing matang sa trabaho nga ilang gituohang gidili. Lakip sa ilang listahan ang pag-ani ug paggaling sa trigo. Tungod niini, sa pagkakita sa mga Pariseo nga ang mga tinun-an nangutlo ug mga uhay ug nagkuskos niini aron makuha ang mga lugas gikan sa mga upa ug makaon kini, gikondenar nila ang mga tinun-an tungod sa pagbuhat sa ilang giisip nga paglapas sa Ikatulong Sugo.
Ang unang butang nga atong mamatikdan niining tekstoha mao nga gigutom ang mga tinun-an. Hilabihan ang ilang debosyon kang Jesus ug nag-uban sila Kaniya sa pagpanaw gikan sa usa ka lungsod ngadto sa lain aron makasangyaw Siya sa Ebanghelyo. Ilang gibiyaan ang ilang panginabuhian, panimalay, pamilya ug kita aron bug-os nga ihalad ang ilang kaugalingon kang Jesus ug sa Iyang misyon. Tungod niini, nagkinabuhi sila sa kakabos ug nagsalig sa pagkamanggihatagon sa uban. Niining kahimtanga, gipili nilang mokaon sa labing yano nga pagkaon: mga lugas nga ilang gipangutlo samtang naglakaw. Wala sila moreklamo nga walay init nga pagkaon nga naghulat kanila sa ilang padulngan. Gidawat nila ang daghang taas nga panaw nga ilang gihimo nga nagbaktas. Wala sila magsapayan nga dili sila makatulog sa ilang kaugalingong higdaanan matag gabii. Apan sama sa tanang tawo, aduna silay sukaranang panginahanglan sa pagkaon, busa nangutlo sila niining mga lugas samtang naglakaw aron matubag ang ilang kagutom.
Bisan tuod daghan kitag makat-onan niining tekstoha, usa ka tin-aw nga pagtulon-an mao ang mahitungod sa tentasyon sa paghukom ug pagkondenar sa uban. Kon mahulog kita sa lit-ag sa paghukom sa uban, adunay pipila ka mga butang nga kasagarang mahitabo. Una, ang paghukom ug pagkondenar kasagarang gibase sa gituohang mga sayop nga gipadako ug gipasobrahan. Tin-aw nga gipadako ug gipasobrahan sa mga Pariseo kining “sala” sa mga tinun-an. Sa atong kinabuhi, ang pagkahukmanon hapit kanunayng naghimo sa gituohang sala sa uban nga mas bug-at pa kay sa tinuod niini, kon sala man gani kini.
Laing kasagarang tentasyon nga nagagikan sa kasingkasing nga mahukmanon ug mokondenar mao ang dili man gani pagsabot sa tawo nga gikondenar. Sa hitabo sa ibabaw, wala man gani mangutana ang mga Pariseo kon nganong nangutlo ug nagkaon sa mga lugas ang mga tinun-an. Wala sila mangutana kon dugay na bang wala makakaon ang mga tinun-an o kon unsa na kadugay silang nagpanaw. Wala silay pagtagad nga gigutom ang mga tinun-an, ug lagmit gigutom pag-ayo. Ingon usab niini kanato: kasagaran, kon maghukom ug mokondenar kita sa uban, mohimo kita sa atong hukom nga wala man gani maningkamot sa pagsabot sa kahimtang.
Sa kataposan, kinahanglang isulti nga wala kitay katungod sa paghukom sa uban. Ang pagbuhat niini kasagarang walay pag-amping ug naggikan sa atong kaugalingong pagkamakikaugalingon. Wala hatagi sa Diyos ang mga Pariseo og awtoridad sa pagpalapad sa Ikatulong Sugo ngadto sa 39 ka gidiling buhat, ni hatagi Niya sila og awtoridad sa paggamit niadtong mga paghubad aron hukman ang ilang nakita nga mga buhat sa mga tinun-an. Ug wala usab kita hatagi sa Diyos og awtoridad sa paghukom sa uban. Kon ang usa ka tawo klarong nalit-ag sa balikbalik nga pagbuhat og sala nga sa iyang kinaiya bug-at, kinahanglan natong buhaton ang tanan natong mahimo aron matabangan siyang makagawas nianang salaa. Apan bisan nianang kahimtanga, wala kitay katungod sa paghukom o pagkondenar.
Pamalandongi karon ang bisan unsang hilig nimo sa paghukom ug pagkondenar sa uban. Kon makita nimo kini nga hilig sa imong kaugalingon, paggahin og panahon sa pagpamalandong bahin sa mga Pariseo. Ang ilang pagpakamatarong sa kaugalingon mangil-ad ug makadaot. Ang daotang panig-ingnan nga ilang gipakita angay magdasig kanato sa pagbiya sa maong mga buhat sa pagkondenar ug sa pagsalikway nianang mga tentasyon sa dihang motungha kini.
Akong diosnong Maghuhukom sa Tanan, Ikaw ug Ikaw lamang ang nasayod sa kasingkasing, ug Ikaw ug Ikaw lamang ang makahimo sa paglihok isip Maghuhukom. Palihog gamita ang Imong awtoridad sa akong kinabuhi aron mailhan nako ang akong kaugalingong sala. Sa pagbuhat Nimo niini, palihog gawasa usab ako gikan sa hilig sa paghukom ug pagkondenar. Hinuon, hatagi ako og kasingkasing nga puno sa kaluoy ug kamatuoran alang sa tanan. Hesus, misalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Santos sa Adlaw – Mahal nga Birhen sa Bukid sa Carmelo
Mga Kapilian sa mga Basahon sa Misa
.jpg){kind=link}