Agosto 13, 2023
Ikanapulog Siyam nga Domingo sa Ordinaryong Panahon (Tuig A)
Mga Pagbasa Karong Adlawa
Paminaw sa Iningles
Human Niya pakan-a ang mga tawo, gipapasakay ni Jesus ang mga tinun-an sa usa ka sakayan ug gipauna ngadto sa pikas daplin, samtang Iyang gipapauli ang panon sa katawhan. Human niini, mitungas Siya sa bukid nga nag-inusara aron mag-ampo. Sa pagkagabii, didto Siya nga nag-inusara. Mateo 14:22–23
Ang atong Ebanghelyo karong adlawa nagtanyag kanato og duha ka managlahi nga hulagway nga angay pamalandongan. Ang una mao ang nahisulat sa ibabaw, ug ang ikaduha mao ang sugilanon sa paglakaw ni Jesus ibabaw sa tubig. Sa ikaduhang sugilanon, ang mga tinun-an nanagbugsay batok sa hangin ug mga balod sa kaadlawon, sa wala pa mosubang ang adlaw. Nagpakita kanila si Jesus nga naglakaw ibabaw sa tubig, ug nangahadlok sila. Giatubang ni Jesus ang ilang kahadlok ug gitawag si Pedro sa paglakaw ibabaw sa tubig isip timaan sa iyang pagtuo Kaniya. Nagsugod si Pedro sa paglakaw ibabaw sa tubig, apan tungod sa kahadlok, misugod siya sa pagkaunlod. Misinggit siya kang Jesus, nga migunit kaniya ug dayon malumong mibadlong kang Pedro tungod sa iyang kakulang sa pagtuo.
Makatabang ang pagsabot sa unang hulagway niining teksto sa Ebanghelyo isip konteksto sa ikaduha. Niining unang hulagway, atong makita si Jesus nga nagpauli sa panon sa katawhan human pakan-a ang lima ka libo ug mitungas sa usa ka bukid aron mag-ampo nga nag-inusara. Bisan tuod si Jesus kanunayng hingpit nga nahiusa sa Amahan ug, busa, wala magkinahanglan sa pag-ampo, nag-ampo gihapon Siya kay kini mao ang Iyang tawhanong pagpahayag sa lawom nga panaghiusa Niya sa Iyang Amahan. Samtang nag-ampo Siya, naghatag usab Siya og panig-ingnan sa tanan nga mosunod Kaniya, nga nagtudlo kanila pinaagi sa Iyang panig-ingnan mahitungod sa kamahinungdanon sa pag-ampo nga mag-inusara. Ang pangunang leksiyon nga Iyang gitudlo niining higayona mao nga ang pag-ampo mao ang pagpangandam nga atong gikinahanglan sa dili pa moabot ang mga pagsulay, aron mabuntog nato ang tanang daw mga babag sa kinabuhi ug maatubang ang kahadlok uban sa hingpit nga pagtuo.
Una, ang tataw nga “babag” nga nabuntog ni Jesus pinaagi sa Iyang pag-ampo gisimbolohan sa Iyang paglakaw ibabaw sa dagat nga gikusokuso sa unos. Walay tawo nga makalakaw ibabaw sa tubig. Imposible kini sa pisikal nga paagi. Apan mao gayod kana ang punto. Kon unahon nato ang atong kinabuhi sa personal nga pag-ampo, giyahan kita sa Diyos aron matuman ang daw imposible alang kanato. Tingali dili kini literal nga paglakaw ibabaw sa tubig, apan ang Iyang paglakaw ibabaw sa tubig human sa tibuok gabii nga pag-ampo nagsimbolo sa matag daw imposibleng butang nga atong giatubang sa kinabuhi. Ang leksiyon mao nga kon kabubut-on kini sa Diyos, walay imposible. Masayran nato kini kon himoon natong labing unang prayoridad ang personal nga pag-ampo.
Ang ikaduhang babag nga giatubang ni Jesus mao ang kahadlok. Ang kahadlok makaparalisar ug mosangpot sa atong “pagkaunlod” kon maglisod na ang kinabuhi. Sa makausa pa, ang personal nga pag-ampo mao ang gikinahanglang pagpangandam aron mabuntog ang kahadlok. Ang makapainteres mao nga aduna kitay duha ka saksi sa pag-ampo. Una mao ang pagpamatuod ni Jesus. Nag-ampo Siya tungod kay maayo ug matarong ang pag-ampo. Ang ikaduha mao si Pedro. Nag-ampo siya sa dihang misugod siya sa pagkaunlod. Miingon siya, “Ginoo, luwasa ako!” Kini mao ang pag-ampo sa usa nga nakulang sa pagtuo ug nag-ampo tungod sa usa ka panginahanglan niadtong higayona, imbes nga tungod sa putli nga gugma sa Diyos. Sa kanunay, si Pedro naglarawan sa kinabuhi sa pag-ampo sa daghang Kristohanon. Kasagaran, maghulat pa kita nga magkinahanglan og tabang ug maunlod una kita mag-ampo. Apan unsa kaha kon si Pedro nagpalabay usab sa gabii diha sa pag-ampo tungod lamang sa gugma sa Diyos? Unsa kaha kon bag-o pa siyang nahuman sa tibuok gabii nga pag-ampo sa dihang gidapit siya sa paglakaw ibabaw sa tubig? Tingali sayon ra unta alang kaniya ang paglakaw padulong kang Jesus ug dili unta siya magpadala sa kahadlok.
Pamalandongi karon ang paghimo sa imong kinabuhi sa pag-ampo nga labing unang prayoridad sa imong kinabuhi. Tingali daghan ka og mga responsibilidad sa kinabuhi. Walay mas importante kay sa pag-ampo—ug dili lamang kon mobati ka nga daw natanggong ka o daw nagkaunlod ka. Hinuon, kitang tanan kinahanglan magpalig-on og batasan sa pag-ampo ngadto sa Dios nga dili gayod mabugto, tungod lamang kay maayo ug matarong ang pagbuhat niini. Ang bunga sa ingon nga kinabuhi sa pag-ampo mao nga, bisan unsang babag ang moabot kanato, maangkon nato ang pagtuo nga atong gikinahanglan aron sundon ang matag sugo sa atong Ginoo, ug mabuntog bisan ang daw imposible.
Akong mainampuong Ginoo, gigahin Mo ang tibuok gabii sa pag-ampo ngadto sa Imong Amahan, dili tungod kay nagkinahanglan Ka og tabang, kondili tungod sa Imong gugma. Ang Imong pag-ampo maoy pagpahayag sa maong gugma ug usa ka butang nga kinaiyanhong gipangayo niini. Palihog tabangi usab ako sa pagpalig-on og batasan sa pag-ampo nga dili gayod mabugto aron ang akong gugma Kanimo magpabiling lig-on ug aron makasunod ako Kanimo latas sa matag daw babag sa kinabuhi. Jesus, nagsalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Santos sa Adlaw – Mga Santos Pontian, Papa, ug Hippolytus, Pari, mga Martir
Dili saulogon isip liturhikanhong handumanan karong tuiga kay natunong kini sa Domingo
Mga Kapilian sa mga Basahon sa Misa
Pangunang Hulagway: De-kolor nga bildo gikan sa St Jude Shrine sa Baltimore, MD., pinaagi sa flickr
