मराठी

स्वर्गाकडे दृष्टी उचलताना

28 मे 2020
पुनरुत्थानकाळातील सातव्या आठवड्याचा गुरुवार
आजची वाचने

स्वर्गाकडे दृष्टी उचलून येशूने अशी प्रार्थना केली: “मी केवळ यांच्यासाठीच प्रार्थना करीत नाही, तर यांच्या वचनामुळे माझ्यावर विश्वास ठेवतील त्यांच्यासाठीही प्रार्थना करतो. हे पित्या, जसा तू माझ्यामध्ये आहेस आणि मी तुझ्यामध्ये आहे, तसे ते सर्व एक असावेत आणि तेही आपल्यामध्ये असावेत, यासाठी की तू मला पाठवलेस असा विश्वास जगाने ठेवावा.” योहान 17:20–21

“स्वर्गाकडे दृष्टी उचलून…” किती सुंदर शब्द आहेत हे!

स्वर्गाकडे दृष्टी उचलून येशूने आपल्या स्वर्गीय पित्याला प्रार्थना केली. दृष्टी उचलण्याच्या या कृतीतून पित्याच्या उपस्थितीचा एक आगळा पैलू उलगडतो: पिता सर्वातीत आहे. ‘सर्वातीत’ म्हणजे पिता सर्वांहून श्रेष्ठ आणि सर्वांच्या पलीकडे आहे. जग त्याला सामावून घेऊ शकत नाही. म्हणूनच पित्याशी बोलताना येशू प्रथम या कृतीतून पित्याचे सर्वातीतपण मान्य करतो.

पण पित्याचे येशूशी असलेले निकटचे नातेही आपण लक्षात घेतले पाहिजे. ‘निकटता’ म्हणजे पिता आणि येशू यांचे ऐक्य. त्यांचे नाते अत्यंत वैयक्तिक आहे.

‘निकटता’ आणि ‘सर्वातीतपणा’ हे शब्द कदाचित आपल्या रोजच्या बोलण्यात येत नसतील; तरी त्यांमागील संकल्पना समजून घेण्यासारख्या आहेत आणि त्यांवर मनन करणेही मोलाचे आहे. या दोन्ही शब्दांचा अर्थ नीट समजून घेण्याचा आपण प्रयत्न केला पाहिजे. विशेषतः, पवित्र त्रैक्याशी असलेल्या आपल्या नात्यात या दोन्ही पैलूंचा अनुभव आपल्याला कसा येतो, हे आपण समजून घेतले पाहिजे.

येशूने पित्याला अशी प्रार्थना केली की, विश्वास ठेवणाऱ्या आपल्याला पिता आणि पुत्र यांच्या ऐक्यात सहभागी होता यावे. देवाच्या जीवनात आणि प्रेमात आपल्याला वाटा मिळेल. याची सुरुवात देवाचे सर्वातीतपण ओळखण्यापासून होते. आपणही स्वर्गाकडे दृष्टी उचलतो आणि देवाचे तेज, गौरव, महानता, सामर्थ्य आणि वैभव पाहण्याचा प्रयत्न करतो. तो सर्वांहून श्रेष्ठ आणि सर्वांच्या पलीकडे आहे.

प्रार्थनेत आपण स्वर्गाकडे दृष्टी लावतो, तेव्हा हा गौरवशाली आणि सर्वातीत देव आपल्या आत्म्यात उतरतो, आपल्याशी संवाद साधतो, आपल्यावर प्रेम करतो आणि आपल्याशी अत्यंत वैयक्तिक नाते जोडतो, हेही पाहण्याचा आपण प्रयत्न केला पाहिजे. देवाच्या जीवनाचे हे दोन पैलू प्रथमदर्शनी एकमेकांच्या अगदी विरुद्ध वाटू शकतात; तरी ते इतके सुंदर रीतीने एकत्र नांदतात, ही आश्चर्याची गोष्ट आहे. ते परस्परविरोधी नाहीत, उलट एकमेकांशी अतूटपणे जोडलेले आहेत. त्यांमुळे सर्व गोष्टींचा निर्माणकर्ता आणि पालनकर्ता याच्याशी असलेल्या जिव्हाळ्याच्या नात्यात आपण ओढले जातो.

विश्वाचा गौरवशाली आणि सर्वशक्तिमान देव तुमच्या आत्म्याच्या गुप्त गाभ्यात उतरतो, यावर आज मनन करा. त्याची उपस्थिती ओळखा. तो तुमच्यात वास करतो, म्हणून त्याची आराधना करा, त्याच्याशी बोला आणि त्याच्यावर प्रेम करा.

हे प्रभू, प्रार्थना करताना माझी दृष्टी नेहमी स्वर्गाकडे उचलण्यास मला मदत कर. मी सदैव तुझ्याकडे आणि तुझ्या पित्याकडे वळत राहावे. प्रार्थनेत अशी दृष्टी लावताना, माझ्या आत्म्यात तू जिवंत आहेस, हेही मला जाणवू दे. तिथे मी तुझी आराधना करतो आणि तुझ्यावर प्रेम करतो. हे येशू, माझा तुझ्यावर विश्वास आहे.

पवित्र आत्म्याची नोव्हेना
पेंटेकॉस्टच्या तयारीसाठी केली जाणारी प्रार्थना
सातवा दिवस – गुरुवार, 28 मे

शुभवर्तमानावरील आणखी चिंतने

दैवी दयेवरील चिंतन

आजचे संत आणि सण

मिस्साच्या वाचनांचे पर्याय

चित्र: गेतसेमनीतील ख्रिस्त — हाइनरिख होफमान यांचे चित्र