Hunyo 13, 2024
Handumanan ni San Antonio de Padua, pari ug doktor sa Simbahan
Mga Pagbasa alang sa Karong Adlawa
Mga Pagbasa alang sa Huwebes sa Ikanapulong Semana sa Ordinaryong Panahon
Paminaw sa Iningles
“Nakadungog kamo nga giingon ngadto sa inyong mga katigulangan, Ayaw pagpatay; ug bisan kinsa nga mopatay manubag sa hukmanan. Apan sultihan ko kamo, bisan kinsa nga masuko sa iyang igsoon manubag sa hukmanan, ug bisan kinsa nga moingon sa iyang igsoon, Raqa, manubag sa Sanhedrin, ug bisan kinsa nga moingon, ‘Buang ka,’ mahiagom sa nagdilaab nga Gehenna.” Mateo 5:21–22
Ang kinutlo sa ibabaw nagpakita kanato og tulo ka nagkalalom nga ang-ang sa sala nga atong mabuhat batok sa uban. Kini nga mga sala maoy bag-ong mga pagtulon-an nga wala sa Daang Tugon. Pinaagi niini nga pagtulon-an, tin-aw kaayo ang panawagan ni Jesus ngadto sa pagkabalaan nga miabot hangtod sa kinauyokan sa atong pagkatawo ug sa paghigugma sa isigkatawo.
Ang unang ang-ang sa sala mao ang yano nga “pagkasuko” sa sulod. Ang sala sa kasuko mao ang tinagong kinaiya sa pagdumot sa laing tawo. Si Jesus nag-ingon nga ang sangpotanan sa pagkasuko sa uban mao nga ikaw “manubag sa hukmanan.” Ang ikaduhang ang-ang sa sala mao ang pag-ingon nimo sa uban og “Raqa.” Kining pulonga sa Aramaiko lisod hubaron apan naglakip kini og usa ka paagi sa pagpahayag sa kasuko ngadto sa uban. Usa kini ka mapasipalahong paagi sa pagsulti sa laing tawo nga siya walay utok o ubos og pagkatawo. Ang ikatulong ang-ang sa sala nga gipaila ni Jesus mao ang pagtawag sa uban og “buang.” Kining pulonga mas grabe pa nga pagpahayag sa Raqa ug usa ka pagsaway pinaagi sa pulong nga nagpasabot nga ang maong tawo usa ka kalag nga nahisalaag sa moral nga bahin. Usa kini ka mapintas nga pagpahayag sa moral nga pagkondenar sa uban.
Busa, naglisod ka ba sa pagpugong sa kasuko? Hataas kaayo ang sukdanan sa panawagan ni Jesus nga mahigawas kita gikan sa tanang ang-ang niini nga sala. Daghang higayon sa kinabuhi nga mapukaw ang atong pagbati sa kasuko tungod sa lainlaing hinungdan, ug kana nga pagbati motultol ngadto sa usa niini nga mga ang-ang sa sala. Kasagarang tentasyon ang pagtinguha nga kondenahon sa labing mapintas nga paagi ang tawo nga atong gikasuk-an.
Mahinungdanon nga masabtan nato nga kining bag-ong pagtulon-an ni Jesus dili gayod palas-anon kon masabtan ug dawaton kini sa kinasingkasing. Sa sinugdan, daw negatibo kining mga balaod sa atong Ginoo batok sa kasuko. Kini tungod kay ang pagpaninghag sa uban naghatag og bakak nga katagbawan, ug kining mga sugo sa atong Ginoo, sa usa ka paagi, “nag-ilog” kanato niana nga katagbawan. Makapaluya tingali ang paghunahuna sa moral nga katungdanan sa pagpasaylo hangtod nga mawala ang dili hustong kasuko. Apan makapaluya ba gayod kini? Palas-anon ba kining balaod sa atong Ginoo?
Ang lawom nga kamatuoran mao nga ang gitudlo ni Jesus kanato niini nga teksto, sa daghang paagi, mas alang sa atong kaugalingong kaayohan kay sa kaayohan sa uban. Ang atong kasuko ngadto sa uban—gitago man sa sulod, gipahayag pinaagi sa pagsaway, o gipagawas sa bug-os nga pagkondenar—makapasakit sa tawo nga atong gikasuk-an, apan mas grabe ang kadaot nga mahimo kanato niining mga matang sa kasuko kay kanila. Ang pagkasuko, bisan gitago lamang sa sulod, bisan pa og magpakaaron-ingnon kitang malipayon, makadaot pag-ayo sa atong kalag ug sa atong katakos nga mahiusa sa Dios. Tungod niini, dili kining bag-ong balaod sa atong Ginoo mahitungod sa kasuko ang palas-anon; ang kasuko mismo mao ang bug-at nga palas-anon, ug gikan niini gusto ni Jesus nga mahigawas ka.
Pamalandongi karong adlawa ang sala sa kasuko. Samtang nagbuhat ka niini, paningkamoti nga makita ang imong dili hustong kasuko ingon nga mao ang tinuod nga kaaway, imbes ang tawo nga imong gikasuk-an. Pag-ampo sa atong Ginoo nga luwason ka gikan niining kaaway sa kalag, ug tinguhaa ang kagawasan nga buot Niyang ihatag kanimo.
Maloloy-on kong Ginoo, gitawag Mo kami ngadto sa hingpit nga kagawasan gikan sa tanang nakapabug-at kanamo. Ang kasuko maoy usa ka palas-anon alang kanamo. Tabangi ako nga makita ang palas-anong gipahamtang kanako sa akong kasuko ug tabangi ako sa pagpangita sa tinuod nga kagawasan pinaagi sa pagpasaylo ug pagpasig-uli. Palihog pasayloa ako, minahal kong Ginoo, samtang gipasaylo ko ang tanang nakapasakit kanako. Jesus, misalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Santos sa Adlaw – San Antonio de Padua, Pari ug Doktor—Handumanan
Mga Kapilian sa mga Basahon sa Misa
Mga hulagway nga gipakita sa ibabaw: Ang Wali sa Bukid ni Fra Angelico, pinaagi sa Wikimedia Commons
