Sunday, July 28, 2019
Seventeenth Sunday of Ordinary Time, Year C
“At sinasabi ko sa inyo, humingi kayo at kayo ay tatanggap; humanap kayo at kayo ay makasusumpong; kumatok kayo at kayo ay pagbubuksan.” Luke 11:9
Kung uunawain natin nang lubhang literal ang pahayag na ito ni Hesus, madali nating mahihinuha na ibibigay Niya sa atin ang anumang hingin natin sa panalangin. Ngunit alam nating hindi ganito ang nangyayari. Marahil ang bawat isa sa atin ay taimtim nang nanalangin para sa kung ano-anong bagay, ngunit hindi natugunan ang kahilingan sa paraang nais natin. Bakit kaya? Nagkulang lang ba tayo sa pananalanging may pananampalataya? Gagawin ba ni Hesus ang anumang hilingin natin sa Kanya kapag ipinanalangin natin ito nang buong lakas? Tiyak na hindi.
Nagpapatuloy ang siping ito: “Kung kayong masasama ay marunong magbigay ng mabubuting kaloob sa inyong mga anak, gaano pa kaya ang Ama sa langit na magbibigay ng Espiritu Santo sa mga humihingi sa kanya?” (Luke 11:13). Sa kontekstong ito, at sa konteksto ng lahat ng itinuro sa atin ni Hesus, mahalagang malaman na iisa lamang ang dapat nating ipanalangin. At kapag ipinanalangin natin ang nag-iisang bagay na ito nang may pananampalataya, makatitiyak tayong makakamit natin ito. Ano ang nag-iisang bagay na iyon? Ang kalooban ng Diyos.
Kung tapat at buong puso nating hinihiling at hinahanap ang kalooban ng Diyos, makatitiyak tayong ipagkakaloob sa atin ng ating Panginoon ang Espiritu Santo, at aakayin naman tayo ng Espiritu Santo tungo sa kalooban ng Diyos para sa ating buhay. Ang problema ay napakadalas nating mauwi sa pananalanging “Sundin ang loob KO” sa halip na “Sundin ang loob MO.” Mahalaga ang pagkakaibang ito.
Sa pinakadiwa nito, ang tunay na panalangin ay pagtitiwala at pagpapasakop sa Diyos. Nagtitiwala tayo sa Kanyang ganap na plano at nagpapasakop tayo sa ganap na planong iyon para sa ating buhay. Kapag ginawa natin ito, makatitiyak tayong diringgin at tutugunin ng Panginoon ang ganap na panalanging ito.
Pagnilayan ngayon ang payak na panalanging ito sa Ama Namin: Sundin ang loob Mo! Sikaping magtiwala sa ganap na plano ng Diyos para sa iyong buhay at gawin ang lahat ng iyong makakaya upang magpasakop dito. Sa ganitong paraan ng pananalangin, makatitiyak tayong darating sa atin ang Espiritu Santo at aakayin tayo tungo sa Kanyang banal na kalooban.
Our Father who art in heaven, hallowed be thy name. Thy kingdom come. Thy will be done on earth, as it is in heaven. Give us this day our daily bread, and forgive us our trespasses, as we forgive those who trespass against us, and lead us not into temptation, but deliver us from evil. Jesus, I trust in You.
Higit pang mga Pagninilay sa Ebanghelyo
Mga Pagninilay sa Inaawit na Awa ng Diyos
