May 27, 2020
Wednesday of the Seventh Week of Easter
Readings for Today
San Agustin ng Canterbury, Obispo—Paggunita na Maaaring Ipagdiwang
“Ibinigay Ko sa kanila ang Iyong salita, at kinapootan sila ng sanlibutan, sapagkat hindi sila kabilang sa sanlibutan, kung paanong Ako ay hindi kabilang sa sanlibutan. Hindi Ko hinihiling na alisin Mo sila sa sanlibutan kundi ingatan Mo sila laban sa Masama. Hindi sila kabilang sa sanlibutan, kung paanong Ako ay hindi kabilang sa sanlibutan. Italaga Mo sila sa katotohanan. Ang Iyong salita ay katotohanan.” Juan 17:14–17
“Italaga Mo sila sa katotohanan. Ang Iyong salita ay katotohanan.” Iyan ang susi upang manatiling matatag!
Inihahayag ng Banal na Kasulatan ang tatlong pangunahing tuksong kinakaharap natin sa buhay: ang laman, ang mundo, at ang diyablo. Kumikilos ang tatlong ito upang iligaw tayo. Ngunit ang lahat ng ito ay madaraig sa pamamagitan ng iisang bagay…ang Katotohanan.
Ang sipi ng Ebanghelyo sa itaas ay tuwirang tumutukoy sa “sanlibutan” at sa “Masama.” Ang Masama, na siyang diyablo, ay tunay na umiiral. Kinapopootan niya tayo at ginagawa niya ang lahat upang iligaw tayo at wasakin ang ating buhay. Sinisikap niyang punuin ang ating isip ng mga pangakong walang saysay, nag-aalok siya ng panandaliang kaluguran, at inuudyukan niya tayo sa makasariling mga ambisyon. Sinungaling na siya sa simula pa lamang at nananatiling sinungaling hanggang ngayon.
Isa sa mga tuksong iniharap ng diyablo kay Hesus sa Kanyang apatnapung araw na pag-aayuno sa simula ng Kanyang hayagang ministeryo ay ang tuksong makamtan ang lahat ng maiaalok ng mundo. Ipinakita ng diyablo kay Hesus ang lahat ng kaharian sa daigdig at sinabi, “Ibibigay ko sa Iyo ang lahat ng ito kung magpapatirapa Ka at sasamba sa akin.”
Una sa lahat, walang katuturan ang tuksong ito sapagkat si Hesus na mismo ang Manlilikha ng lahat ng bagay. Gayunman, pinahintulutan Niya ang diyablo na tuksuhin Siya sa pamamagitan ng makamundong pang-akit na ito. Bakit Niya ito ginawa? Sapagkat alam ni Hesus na lahat tayo ay tutuksuhin ng maraming pang-akit ng mundo. Maraming bagay ang tinutukoy natin sa salitang “mundo.” Isa sa mga naiisip natin sa panahong ito ay ang pagnanais na tanggapin tayo ng mundo. Isa itong salot na halos hindi napapansin ngunit nakaaapekto sa napakarami, pati na sa ating Simbahan mismo.
Dahil sa malakas na impluwensiya ng midya at ng pandaigdigang kulturang pampolitika, higit kaysa dati ang panggigipit sa atin ngayon bilang mga Kristiyano na basta na lamang umayon sa takbo ng ating panahon. Natutukso tayong gawin at paniwalaan kung ano ang popular at katanggap-tanggap sa lipunan. At ang “ebanghelyong” hinahayaan nating pakinggan ay ang sekular na mundong walang pakialam sa pagkakaiba ng tama at mali.
May malakas na pagkiling sa kultura na maging mga taong handang tanggapin ang anuman at lahat ng bagay—isang pandaigdigang pagkiling dahil sa Internet at midya. Nawala na ang ating pagpapahalaga sa moral na integridad at katotohanan. Kaya naman, higit kailanman, kailangan nating yakapin ngayon ang mga salita ni Hesus. “Ang Iyong Salita ay Katotohanan.” Ang Salita ng Diyos, ang Ebanghelyo, ang lahat ng itinuturo ng ating Katesismo, at ang lahat ng inihahayag ng ating pananampalataya ay ang Katotohanan. Ang Katotohanang ito ang dapat maging tanglaw natin, at wala nang iba.
Pagnilayan mo ngayon kung gaano kalaki ang impluwensiya sa iyo ng sekular na kultura. Nagpadala ka na ba sa panggigipit ng sekular na lipunan, o sa mga sekular na “ebanghelyo” ng ating panahon? Kailangan ng katatagan upang labanan ang mga kasinungalingang ito. Malalabanan lamang natin ang mga ito kung mananatili tayong nakatalaga sa Katotohanan.
Lord, I do consecrate myself to You. You are the Truth. Your Word is what I need to stay focused and to navigate through the many lies all around me. Give me strength and wisdom so that I may always remain in Your protection away from the evil one. Jesus, I trust in You.
Novena to the Holy Spirit
Prayed in preparation for Pentecost
Day Six – Wednesday, May 27
Higit pang mga Pagninilay sa Ebanghelyo
Mga Pagninilay sa Inaawit na Awa ng Diyos
Santo sa Araw na Ito – San Agustin ng Canterbury, Obispo
Mga Pagpipilian sa mga Pagbasa sa Misa
Image: Jesus Tempted by Carl Heinrich Bloch
