നവംബർ 12, 2026
മെത്രാനും രക്തസാക്ഷിയുമായ വിശുദ്ധ ജോസഫാത്തിന്റെ അനുസ്മരണം
ഇന്നത്തെ വായനകൾ
ആണ്ടുവട്ടത്തിലെ മുപ്പത്തിരണ്ടാം ആഴ്ചയിലെ വ്യാഴാഴ്ചത്തെ വായനകൾ
ദൈവരാജ്യം എപ്പോഴാണ് വരുന്നതെന്ന് ഫരിസേയർ ചോദിച്ചപ്പോൾ യേശു മറുപടി പറഞ്ഞു: “ദൈവരാജ്യത്തിന്റെ വരവ് നിരീക്ഷിച്ചറിയാൻ കഴിയില്ല. ‘നോക്കൂ, അത് ഇവിടെയാണ്’ എന്നോ ‘അതാ അവിടെ’ എന്നോ ആരും പറയുകയുമില്ല. എന്തെന്നാൽ ഇതാ, ദൈവരാജ്യം നിങ്ങളുടെ ഇടയിൽത്തന്നെയുണ്ട്.” ലൂക്കാ 17:20–21
തങ്ങളുടെ കാലത്തെ അനേകം യഹൂദരെപ്പോലെ ഫരിസേയരും ദൈവരാജ്യം വിസ്മയകരവും ദൃശ്യവും രാഷ്ട്രീയവുമായ രീതിയിൽ വരുമെന്ന് പ്രതീക്ഷിച്ചിരുന്നു. ഇസ്രായേലിനെ റോമൻ ഭരണത്തിൽനിന്ന് മോചിപ്പിക്കുകയും ദേശീയസ്വാതന്ത്ര്യം പുനഃസ്ഥാപിക്കുകയും ശത്രുക്കളുടെമേലുള്ള വിജയത്താൽ ശോഭിക്കുന്ന മഹത്തായ ഒരു ഭൗമിക ഭരണം സ്ഥാപിക്കുകയും ചെയ്യുന്ന, ദാവീദുരാജാവിന്റെ വംശത്തിൽപ്പെട്ട ഒരു മിശിഹായെയാണ് അവർ കാത്തിരുന്നത്. അവരുടെ പ്രതീക്ഷ തികച്ചും ഭൗമികമായിരുന്നു, ആത്മീയമായിരുന്നില്ല. അതിനാൽ, ദൈവരാജ്യം എപ്പോൾ വരുമെന്ന അവരുടെ ചോദ്യം ദൈവത്തെയും ഈ നിമിഷത്തിൽ അവിടുന്ന് നടത്തുന്ന രക്ഷാകരപ്രവർത്തനത്തെയും കുറിച്ചുള്ള അടിസ്ഥാനപരമായ ഒരു തെറ്റിദ്ധാരണ വെളിപ്പെടുത്തുന്നു.
അവരുടെ ചോദ്യം വെറും ജിജ്ഞാസയിൽനിന്ന് ഉയർന്നതായിരിക്കണമെന്നില്ല. അത് ഒരു പരീക്ഷണമോ ഒരുപക്ഷേ ഒരു കെണിപോലുമോ ആയിരുന്നിരിക്കാം. യേശുവിൽനിന്ന് പഠിക്കാനല്ല, മറിച്ച് അവിടുത്തെ ഒരു വഞ്ചകനായി ചിത്രീകരിക്കാനും അവിടുത്തെ വിശ്വാസ്യത തകർക്കാനുമാണ് ഫരിസേയർ പലപ്പോഴും അവിടുത്തെ ചോദ്യം ചെയ്തിരുന്നത്. മാനുഷികജ്ഞാനത്തിൽ മാത്രം ആശ്രയിച്ചുകൊണ്ട്, നമ്മുടെ കർത്താവിനെ അപകീർത്തിപ്പെടുത്താനുള്ള ആയുധമായി അവർ ആ “ജ്ഞാനം” ഉപയോഗിച്ചു. യേശു വീണ്ടുവിചാരമില്ലാതെ ഒരു നിശ്ചിത സമയക്രമം പറഞ്ഞുകൊടുക്കുമെന്നും അതുവഴി വ്യാജപ്രവചനം നടത്തിയെന്ന് അവിടുത്തെ കുറ്റപ്പെടുത്താനോ ജനങ്ങൾക്കിടയിൽ അസ്വസ്ഥത ഇളക്കിവിടാനോ തങ്ങൾക്ക് അവസരം ലഭിക്കുമെന്നും അവർ പ്രതീക്ഷിച്ചിരിക്കാം. മിശിഹായ്ക്ക് വഴിയൊരുക്കാൻ നിയോഗിക്കപ്പെട്ട മതനേതാക്കൾതന്നെ അവിടുത്തെ ഏറ്റവും വലിയ എതിരാളികളായിത്തീർന്നത് എത്ര ദുഃഖകരമാണ്!
യഥാർഥ ദൈവരാജ്യം ഭൗമികനേത്രങ്ങൾകൊണ്ട് “നിരീക്ഷിച്ചറിയാൻ” കഴിയുന്ന ഒന്നല്ലെന്ന് വെളിപ്പെടുത്തിക്കൊണ്ട്, രാഷ്ട്രീയമോ ദൃശ്യമോ ആയ ഒരു മിശിഹാരാജ്യത്തെക്കുറിച്ചുള്ള അവരുടെ തെറ്റായ പ്രതീക്ഷ യേശു തിരുത്തുന്നു. ഭൂമിശാസ്ത്രപരമോ രാഷ്ട്രീയമോ ആയ അർഥത്തിൽ അത് “ഇവിടെയോ” “അവിടെയോ” കണ്ടെത്താനാവില്ല. പകരം, “ദൈവരാജ്യം നിങ്ങളുടെ ഇടയിൽത്തന്നെയുണ്ട്” എന്ന് അവിടുന്ന് പറയുന്നു. “നിങ്ങളുടെ ഇടയിൽ” എന്നു പരിഭാഷപ്പെടുത്തിയിരിക്കുന്ന ഗ്രീക്കു പ്രയോഗം “നിങ്ങളുടെ ഉള്ളിൽ” എന്നും പരിഭാഷപ്പെടുത്താം. ക്രിസ്തുവിന്റെ സാന്നിധ്യത്തിലൂടെ ദൈവരാജ്യം അവരുടെ മധ്യേ ഉണ്ടെന്നോ, വിശ്വസിക്കുന്നവരുടെ ഹൃദയങ്ങൾക്കുള്ളിൽ ഉണ്ടെന്നോ ഇത് സൂചിപ്പിക്കുന്നു.
“സ്വർഗസ്ഥനായ ഞങ്ങളുടെ പിതാവേ” എന്ന പ്രാർഥനയെക്കുറിച്ചുള്ള തന്റെ വ്യാഖ്യാനത്തിൽ, “അങ്ങയുടെ രാജ്യം വരണമേ” എന്ന യാചന ക്രിസ്തുവിനെത്തന്നെയാണ് സൂചിപ്പിക്കുന്നതെന്ന് വിശുദ്ധ അഗസ്തീനോസ് പഠിപ്പിക്കുന്നു. യേശുതന്നെയാണ് ആ രാജ്യം. അവിടുന്ന് സന്നിഹിതനായിരിക്കുന്നിടത്ത് ദൈവരാജ്യം തീർച്ചയായും വന്നുകഴിഞ്ഞു.
രണ്ടായിരം വർഷങ്ങൾക്കിപ്പുറം, ദൈവരാജ്യം എപ്പോഴാണ് വരുന്നതെന്ന് നാം നമ്മുടെ കർത്താവിനോട് ചോദിച്ചാൽ, നമ്മുടെ ചോദ്യത്തിന്റെ ആത്മാർഥത തിരിച്ചറിയാൻ അവിടുന്ന് ആദ്യം നമ്മുടെ ഹൃദയങ്ങളിലേക്കു നോക്കും. അവിടെ എളിമയും സത്യത്തിനായുള്ള ദാഹവും കണ്ടെത്തുകയും നാം അന്വേഷിക്കുന്നത് ഒരു അടയാളമല്ല, അവിടുത്തെത്തന്നെയാണെന്ന് കാണുകയും ചെയ്താൽ, അഗാധമായ വിധങ്ങളിൽ അവിടുന്ന് തന്റെ സാന്നിധ്യം നമുക്കു വെളിപ്പെടുത്തും.
ഈ ലോകത്തിൽ ക്രിസ്തുവിന്റെ സാന്നിധ്യം നിങ്ങൾ തിരിച്ചറിയുന്നുണ്ടോ? മനുഷ്യാവതാരത്താൽ, നമ്മുടെ രാജാവും മിശിഹായുമായ ദൈവപുത്രൻ എണ്ണമറ്റ വിധങ്ങളിൽ സന്നിഹിതനായി തുടരുന്നു. കൂദാശകളിലും തന്റെ ജീവിക്കുന്ന വചനത്തിലും തന്റെ സഭയിലും സ്നേഹത്തോടും സത്യത്തോടുംകൂടെ അവിടുത്തെ സേവിക്കുന്നവരുടെ ജീവിതങ്ങളിലും അവിടുന്ന് നമ്മുടെ ഇടയിലുണ്ട്. നാം പ്രാർഥിക്കുകയും അവിടുത്തേക്ക് നമ്മെത്തന്നെ സമർപ്പിക്കുകയും കൃപയാൽ നമ്മുടെ ഇഷ്ടം അവിടുത്തെ തിരുഹിതത്തിന് അനുരൂപമാക്കുകയും അവിടുത്തെ സ്നേഹം മറ്റുള്ളവരിലേക്ക് പ്രതിഫലിപ്പിക്കുകയും ചെയ്യുമ്പോൾ അവിടുന്ന് നമ്മുടെ ഉള്ളിലുണ്ട്.
എന്നിരുന്നാലും, ജീവിതയാത്രയിൽ നാം പലപ്പോഴും ഇന്നിനുവേണ്ടിയല്ല, നാളേക്കുവേണ്ടിയാണ് ജീവിക്കുന്നത്. കാര്യങ്ങൾ മെച്ചപ്പെടുന്ന കാലത്തെക്കുറിച്ച് ചിന്തിച്ച്, ഈ നിമിഷത്തിലുള്ള ക്രിസ്തുവിന്റെ വിശുദ്ധ സാന്നിധ്യം നാം അവഗണിക്കുന്നു. ഫരിസേയരുടെ മോശമായ മാതൃകയിൽനിന്ന് പാഠം പഠിച്ചുകൊണ്ട്, ദൂരെയുള്ളതോ പിന്നീടു വരാനിരിക്കുന്നതോ ആയ എന്തിനെയെങ്കിലും അന്വേഷിക്കാനല്ല, മറിച്ച് ഇപ്പോൾത്തന്നെ ഇവിടെ നമ്മുടെ മധ്യേ വസിക്കുന്ന അവിടുത്തെ തിരിച്ചറിയാനാണ് നാം ക്ഷണിക്കപ്പെടുന്നത്. നാം അവിടുത്തെ തിരിച്ചറിയുന്നതിനും സ്നേഹിക്കുന്നതിനും അവിടുത്തേക്ക് സാക്ഷ്യം വഹിക്കുന്നതിനും അവിടുന്ന് കാത്തിരിക്കുന്നു.
നിങ്ങളുടെ ജീവിതത്തിൽ ഇപ്പോൾത്തന്നെയുള്ള ദൈവത്തിന്റെ നിശ്ശബ്ദവും നിരന്തരവുമായ സാന്നിധ്യം അവഗണിച്ചുകൊണ്ട്, ഭാവിയിലെ ഏതെങ്കിലും നിമിഷത്തിലോ അസാധാരണമായ അടയാളത്തിലോ അവിടുത്തെ അന്വേഷിക്കാനുള്ള പ്രവണത നിങ്ങൾക്കുണ്ടോ എന്ന് ഇന്ന് ധ്യാനിക്കുക. പ്രാർഥനയിലും കൃപയിലും വിശുദ്ധ കുർബാനയിലും അവിടുന്ന് നിങ്ങളുടെ മുമ്പിൽ കൊണ്ടുവരുന്ന മനുഷ്യരിലും അവിടുന്ന് “നിങ്ങളുടെ ഇടയിലും” “നിങ്ങളുടെ ഉള്ളിലും” സന്നിഹിതനായിരിക്കുന്ന വിധങ്ങളെക്കുറിച്ച് ചിന്തിക്കുക. ക്രിസ്തുവിലൂടെ അവിടുത്തെ രാജ്യം ഇതിനകം വന്നുകഴിഞ്ഞുവെന്ന് നിങ്ങൾ യഥാർഥത്തിൽ വിശ്വസിക്കുന്നുണ്ടോ എന്നും, ആ രാജ്യവുമായുള്ള ഐക്യത്തിൽ ഓരോ ദിവസവും ജീവിക്കുന്നുണ്ടോ എന്നും ചിന്തിക്കുക. ഇങ്ങനെ ധ്യാനിക്കുമ്പോൾ, ക്രിസ്തു അകലെയല്ല എന്ന ബോധ്യം പുതുക്കുക. അവിടുന്ന് ഇവിടെയുണ്ട്. മറഞ്ഞിരിക്കുന്ന മഹിമയിൽ അവിടുന്ന് ഇപ്പോൾത്തന്നെ വാഴുന്നു; പൂർണഹൃദയത്തോടെ അവിടുത്തെ കണ്ടെത്താനും സേവിക്കാനും നിങ്ങളെ ക്ഷണിക്കുന്നു.
എന്റെ കർത്താവും രാജാവുമായവനേ, അങ്ങ് ഏതോ വിദൂരദേശത്ത് മറഞ്ഞിരിക്കുന്ന, അകലെയുള്ള ഒരു ഭരണാധികാരിയല്ല. അങ്ങ് ഇവിടെ, ഞങ്ങളുടെ ഇടയിലും വിശ്വസിക്കുന്നവരുടെ ഉള്ളിലും ഉണ്ട്. വിശുദ്ധ കുർബാനയിലും അങ്ങയുടെ വചനത്തിലും എന്റെ ഹൃദയത്തിലെ കൃപയുടെ നിശ്ശബ്ദ ചലനങ്ങളിലും ഇന്ന് അങ്ങയുടെ സാന്നിധ്യം തിരിച്ചറിയാൻ എന്നെ സഹായിക്കണമേ. പൊള്ളയായ അടയാളങ്ങളിൽ ഒരിക്കലും അങ്ങയെ അന്വേഷിക്കാതെ, അങ്ങ് യഥാർഥത്തിൽ വസിക്കുന്നിടത്ത് അങ്ങയെ തിരിച്ചറിയാൻ എനിക്കാകട്ടെ. കർത്താവേ, ഇന്നും എന്നും എന്റെ ഹൃദയത്തിൽ വാഴുകയും അങ്ങയുടെ രാജ്യത്തിന്റെ ജീവിക്കുന്ന സാക്ഷിയായി എന്നെ മാറ്റുകയും ചെയ്യണമേ. ഈശോയേ, ഞാൻ അങ്ങയിൽ ശരണപ്പെടുന്നു.
ഇന്നത്തെ വിശുദ്ധൻ – മെത്രാനും രക്തസാക്ഷിയുമായ വിശുദ്ധ ജോസഫാത്ത്
സ്വർഗസ്ഥനായ ഞങ്ങളുടെ പിതാവേ: അഭിലാഷങ്ങളെ വളർത്തുന്ന പാഠശാലയായി കർത്തൃപ്രാർഥന എന്ന പുസ്തകം പരിചയപ്പെടുക
ദൈവകരുണയെക്കുറിച്ചുള്ള വിചിന്തനങ്ങൾ
ആണ്ടുവട്ടത്തിലേക്കുള്ള വിശുദ്ധലിഖിത ധ്യാനങ്ങൾ
വിശുദ്ധ കുർബാനയിലെ വായനകൾക്കുള്ള തിരഞ്ഞെടുപ്പുകൾ
